Përmirësimi i jetesës

Ne jemi angazhuar dhe do të angazhohemi në mënyrë të hapur dhe pro-aktive, duke treguar gjithnjë respekt për të gjitha komunitetet përgjatë gjurmës së gazsjellësit.

TAP ka kthyer në gjendjen e mëparshme tokat e prekura nga ndërtimi, duke ia kthyer pronarëve përkatës dhe mbështetur kthimin në gjendjen e mëparshme dhe përmirësimin e prodhimit dhe të jetesës.

Projektet tona të investimeve sociale dhe mjedisore (ISM) përbëjnë gurin e themelit të angazhimit tonë në të ardhmen e komuniteteve të prekura. Përmes nismave ISM, ne jemi angazhuar të investojmë mbi 55 milionë euro në këto komunitete.

Sistemi i menaxhimit të çështjeve mjedisore, sociale dhe trashëgimisë kulturore (SM MSTK) fokusohet te procesi dinamik i vlerësimit, planifikimi i aktiviteteve, menaxhimi, zbutja dhe monitorimi lidhur me jetesën e vendasve përgjatë gjurmës së gazsjellësit.

Ai përbëhet nga katër hapa kyçë:

1. Shmangia
2. Minimizimi dhe zbutja
3. Rehabilitimi
4. Kompensimi

Në përputhje me standardet ndërkombëtare, si dhe ligjet e praktikat kombëtare, TAP i ka kompensuar familjet e prekura për tokën, të mbjellat, pasuritë apo kufizimet e përdorimit të tokës gjatë ndërtimit të gazsjellësit.

Procesi i Marrjes në Përdorim dhe në Dorëzim të Tokës nga TAP siguron kompensimin e drejtë dhe transparent të të gjithë familjeve të prekura për përvetësimin e të drejtave të përdorimit të tokës përgjatë gjurmës së gazsjellësit.

Krahas kësaj, TAP ka mbikëqyrur zbatimin e një programi për mbështetjen e kthimit të tokës së kultivuar dhe të pakultivuar përgjatë korridorit të ndërtimit të gazsjellësit në gjendjen e mëparshme. Kjo përfshinte:

• Rindërtimin e infrastrukturës së kullimit të tokës, rrugëve dhe/ose rrjeteve apo objekteve të tjera që u prekën apo u zhvendosën gjatë ndërtimit
• Kthimin e tokës në gjendjen e mëparshme
• Projektimin dhe instalimin e masave inxhinierike për kontrollin e erozionit dhe të kullimit në vendet e rrezikuara nga erozioni
• Rihedhjen e pjesës së sipërme të dheut (e cila u grumbullua në pirgje gjatë hapjes së të drejtës së kalimit për të ruajtur pjellorinë e saj)
• Ofrimin e asistencës për programet e rikthimit të bimësisë dhe vlerave ekologjike në tokat e pakultivuara, në bashkëpunim me autoritetet pyjore 
• Ofrimin e asistencës për programet e rikthimit të vlerave bujqësore dhe të biodiversitetit, për të përshpejtuar prodhimtarinë e tokave të kultivuara dhe rikthimin e vlerave të biodiversitetit, me mbështetjen e agronomëve kombëtarë dhe ndërkombëtarë dhe specialistëve për kthimin e jetesës në gjendjen e mëparshme dhe të biodiversitetit
• Monitorimin për konfirmimin e realizimit të kthimit në gjendjen e mëparshme dhe identifikimin e çështjeve që kanë lindur pas kthimit mbrapsht të tokës.

Ne e kuptojmë rëndësinë ekonomike dhe sociale të tokës për komunitetet përgjatë gjurmës së gazsjellësit.

Krahas ofrimit të kompensimit financiar për individët e prekur në përputhje me legjislacionin e zbatueshëm, TAP ka zhvilluar programin e Asistencës për Jetesën dhe Mbështetjen Tranzitore (AJMT), i cili përfshin:

• Promovimin e kthimit në gjendjen e mëparshme dhe përmirësimit të prodhimtarisë bujqësore të parcelave të tokës të prekura, përfshi monitorimin agronomik, mbështetjen përmes këshillimit dhe ndërhyrjeve, të tilla si ofrimi i afro 300 tonë pleh kimik në Shqipëri dhe 1,467 tonë në Greqi
• Sigurimin se familjet e prekura nga marrja në përdorim të përhershëm të tokës, të mund t’iu zëvendësohet toka, nëse dëshirojnë
• Sigurimin se gjendja e kultivuesve të bimëve me rrënjë të thella, të cilët janë prekur vazhdimisht nga kufizimet e përdorimit të tokës, të mos përkeqësohet krahasuar me gjendjen përpara ndërtimit të gazsjellësit, duke përfshirë ofrimin e 82.000 fidanëve në Shqipëri dhe 41.865 në Greqi
• Identifikimin, monitorimin dhe, kur shihet e përshtatshme, ofrimin e mbështetjes për familjet në vështirësi
• Promovimin e diversifikimit të jetesës përmes bujqësisë duke mbështetur novacionin, sipërmarrjet dhe programet e lidhjes me tregun
• Monitorimin dhe promovimin e asistencës për bizneset e peshkimit dhe turizmit në Shqipëri dhe Itali

Përkushtimi i TAP ndaj transparencës, llogaridhënies dhe dialogut me palët e interesit përcaktohet në politikën e Përgjegjësisë Sociale të Korporatës (PSK).

Ne angazhohemi në mënyrë të hapur, pro-aktive me palët tona të interesit, duke treguar gjithnjë respekt për ta dhe duke i përfshirë pikëpamjet e tyre në aktivitetet tona.

Parimet e PSK-së pasqyrohen jo vetëm në aktivitet tona, por edhe në ato të kontraktorëve dhe furnitorëve tanë të cilët monitorohen nga afër për të siguruar pajtueshmëri.

Procedura jonë e ankimimit i lejon vendasit që të shprehin shqetësimet ose kundërshtimet e tyre, të cilat TAP i shqyrton dhe përpiqet t’i japë zgjidhje.