Skip to main content

Kthehuni në listën e plotë të lajmeve

TAP Vlerësohet me Çmimin e Filantropisë për Kontribut në Nivel Kombëtar

27 shkurt 2019

Tiranë, Shqipëri. Më 22 shkurt 2019, Partnerët Shqipëri i kanë dorëzuar Gazsjellësit Trans Adriatik (TAP) Çmimin e Filantropisë për Kontributin Social në Nivel Kombëtar. Ky çmim iu dha TAP për ndërtimin e kopshtit të fshatit Pashalli dhe shkollës së Konizbaltës në bashkinë e Urës Vajgurore, si dhe muzeun “Gjon Mili” në Korçë.

 

Në ceremoninë e organizuar ishin të pranishëm përfaqësues nga Qeveria Shqiptare, deputetë të Kuvendit të Shqipërisë, përfaqësues të trupit diplomatik në Shqipëri, të bizneseve dhe të organizatave jofitimprurëse.

Në fjalën e tij, Menaxheri i TAP për Shqipërinë, Malfor Nuri, tha: “Ne besojmë se jemi fqinj të mirë të komuniteteve që na kanë mirëkuptuar dhe na kanë mirëpritur. Me shumë krenari e them se deri më sot kemi kontribuar në përmirësimin e jetesës së këtyre komunitete duke realizuar mbi 30 investime madhore. Janë afërsisht 200’000 persona që përfitojnë në mënyrë të drejtpërdrejte ose të tërthortë nga Investimet Sociale dhe Mjedisore të TAP që për Shqipërinë kapin vlerën e 14 milion eurove.”

Partnerët Shqipëri organizojnë çdo vit, që prej vitit 2011, ndarjen e çmimeve të filantropisë për të vlerësuar dhe shprehur mirënjohjen për individët dhe bizneset që kontribuojnë për përmirësimin e cilësisë së jetës në shoqëri. Çmimet iu dorëzuan fituesve nga personalitete të fushës së politikës, artit, biznesit, akademisë dhe institucioneve ndërkombëtare.

TAP u propozua për çmimin e filantropisë si “Biznes me kontribut në nivel kombëtar” për vitin 2018 nga organizata Catalyst Balkans Foundation. Ky fondacion me shtrirje rajonale monitoron dhe nxit investimet sociale nga ana e bizneseve private.

TAP ka implementuar një gamë të gjerë projektesh të investimeve sociale dhe mjedisore (ISM) në Shqipëri. Këto përfshijnë përmirësimin e disa shkollave dhe kopshteve, rehabilitimin e ujësjellësit të Mbrostarit, mobilimin e Bibliotekës së Beratit dhe rehabilitimin e një numri të kanaleve të ujitjes dhe kanalizimit përgjatë gjurmës së tubacionit. Përveç kësaj, TAP po ndërton dy markata të reja, një në Korçë dhe një në Fier, e cila do të mbështesë mjetet e jetesës së fermerëve.

 

FUND

 

Rreth Gazsjellësit Trans Adriatik (TAP)

TAP-i do të transportojë gaz natyror nga fusha gjigante e Shah Denizit II, në Azerbajxhan, në Evropë. Tubacioni, i gjatë 878 km, do të lidhet me Gazsjellësin Trans Anatolian (TANAP) në kufirin turko-grek, në Kipoi, duke kaluar përmes Greqisë, Shqipërisë dhe detit Adriatik, përpara se të mbërrijë në brigjet e Italisë së Jugut.

Rruga që përshkon TAP-i mund të lehtësojë furnizimin me gaz të disa vendeve të Evropës Juglindore. Dalja në tokë e TAP-it, në Itali, ofron mundësi të shumta për transportimin e mëtejshëm të gazit natyror të Kaspikut në disa nga tregjet më të mëdha evropiane.

TAP-i nxit zhvillimin ekonomik dhe krijimin e vendeve të punës përgjatë gjurmës së tubacionit; ai është një burim i madh i investimeve të huaja direkte. Tashmë që sasia e parë e gazit ka nisur të transportohet drejt Gjeorgjisë dhe Turqisë, sasia e parë e gazit në Evropë do të arrijë në vitin 2020.

Aksionarët e TAP-it janë BP (20%), SOCAR (20%), Snam S.p.A. (20%), Fluxys (19%), Enagás (16%) dhe Axpo (5%).

 

Kontakt për Median: agim.fjolla@tap-ag.com

Më shumë rreth TAP: Twitter | Facebook | Instagram | YouTube